30 студзеня ў Брэсцкім абласным інстытуце развіцця адукацыі прайшоў абласны семінар «Актуальныя практыкі арганізацыі шостага школьнага дня па фарміраванні культуры вольнага часу і занятасці непаўналетніх: вопыт і перспектывы». Вопытам работы педагагічнага калектыву па рэалізацыі праекта «ШАР: Школа актыўных бацькоў» падзялілася Граб Вольга Мікалаеўна, намеснік дырэктара па вучэбна-выхаваўчай рабоце ДУА «Шаняўская сярэдняя школа імя М. Засіма». Праект быў адзначаны дыпломам 1 ступені на абласным этапе рэспубліканскага конкурсу на лепшы праект па арганізацыі шостага школьнага дня ў намінацыі «Субота — майстэрня сямейнага вольнага часу».

Віншуем валанцёрскі атрад “ДОМ”, які заняў 2 месца ў раённым конкурсе валанцёрскіх атрадаў “Доброделы”. Каманда валанцёраў узнагароджана дыпломам і каштоўным падарункам. Жадаем і далей поспехаў у гэтай карыснай справе!

Вучні нашай школы, члены атрада «Выток», прынялі ўдзел у штогадовай урачыстай цырымоніі ўзнагароджання дзяцей Пружанскага раёна, якія з’яўляюцца прызёрамі абласных і рэспубліканскіх алімпіяд, конкурсаў і спаборніцтваў «Дараванне-2023». Віншуем!

Упраўленнем унутраных спраў Брэсцкага аблвыканкама ўзнагароджана дырэктар ДУА «Шаняўская СШ імя Міколы Засіма» Ярмашэвіч А.М. за ўзаемадзеянне і актыўнае супрацоўніцтва з УУС Брэсцкага аблвыканкама па прафілактыцы злачынстваў супраць палавой недатыкальнасці непаўналетніх. Віншуем!

У мэтах распрацоўкі візуальных макетаў сацыяльнай рэкламы УУС сумесна з Галоўным упраўленнем па адукацыі сярод навучэнцаў Брэсцкай вобласці праведзены конкурс на тэму «Лепшыя візуальныя крэатыўныя прафілактычныя матэрыялы па прафілактыцы сексуальнага насілля ў адносінах да дзяцей і падлеткаў, у тым ліку з выкарыстаннем сеткі Інтэрнет. Як не стаць ахвярай кіберзлачынцаў».
2-е месца  заняла Анастасія Міранюк, навучэнка 11 класа ДУА «Шаняўская сярэдняя школа імя Міколы Засіма» Пружанскага раёна Брэсцкай вобласці  (творчая работа  малюнак). Начальнік УУС Брэсцкага аблвыканкама генерал-маёр міліцыі Алег Шулякоўскі ўручыў канкурсантам заслужаныя дыпломы і каштоўныя падарункі. Віншуем Насцю і жадаем далейшых творчых поспехаў!

15 снежня 2023 года Ханіла Яўгений у складзе дэлегацыі навучэнцаў Пружанскага раёна прыняў удзел у дабрачынным навагоднім свяце для дзяцей на базе дзяржаўнай прыродаахоўнай установы «Нацыянальны парк «Белавежская пушча». А пропускам на гэтае свята стала перамога Яўгена ў творчых конкурсах раённага і абласнога ўзроўню. Рэспубліканская акцыя «Нашы дзеці» стартавала 15 снежня і будзе працягвацца ўсе навагоднія і калядныя святы.

У перыяд з 14 лістапада па 28 лістапада 2023 г. прайшоў раённы этап рэспубліканскай выставы-конкурсу «Лёд. Кветкі. Фантазія». Крыніцай натхнення для юных эколагаў стала чароўная атмасфера надыходзячых Новага года і Раства Хрыстова. Адной з галоўных умоў было тое, што арыгінальныя кампазіцыі павінны былі ў асноўным складацца з прыродных матэрыялаў.

Пераможцамі раённага этапа рэспубліканскай выставы-конкурсу “Лёд. Кветкі. Фантазія» сталі: у намінацыі інтэр’ерная праца «Новы год на парозе» ў напрамку міні-ёлка: дыплом III ступені – Валодзькіна Вераніка, Ляшчынская Карына, вучаніцы дзяржаўнай установы адукацыі «Шяняўская сярэдняя школа імя Міколы Засіма». Віншуем дзяўчат!

З мэтай падтрымкі таленавітых дзяцей і моладзі ў галіне выяўленчай і дэкаратыўна-прыкладной творчасці, захавання і развіцця культурных традыцый Рэспублікі Беларусь; абагульнення педагагічнага вопыту ў арганізацыі работы аб’яднанняў па інтарэсах выяўленчай і дэкаратыўна-прыкладной творчасці з 10 лістапада па 24 лістапада 2023 года прайшоў раённы этап абласной выставы дзіцячай творчасці «Усе дзеці таленавітыя». У намінацыі «Кампазіцыя ў нацыянальным стылі» дыплом 1 ступені атрымалі Міранюк і Батура Ксенія. Віншуем дзяўчынак і педагога Семянчук Валянціну Мікалаеўну!