Яркім і запамінальным стала закрыццё месячніка патрыятычнага выхавання, якое завяршылася конкурсам інсцэніраванай песні. У ім прынялі ўдзел усе вучні школы.

Прагучалі як песні ваенных гадоў (“Кацюша”, “У лесе прыфрантавым”, “У зямлянцы”, “Тальяначка”), так і сучасныя патрыятычныя кампазіцыі (“Шлі салдаты на вайну”, “Вайна”, “Пра тую вясну”). Удзельнікі праявілі столькі фантазіі і таленту, што журы складана было вызначыцца ў выбары лепшых.

У выніку перамогу святкавалі вучні 5, 6 і 8 класаў, якія прадставілі на суд гледачоў песні “Пра тую вясну” і “У лесе прыфрантавым”.

Свята песні падарыла ўсім шмат прыемных момантаў.

Напярэдадні Міжнароднага дня роднай мовы ў школе прайшлі тэматычныя інфармацыйныя гадзіны, у ходзе якіх вучні паказалі добрае веданне беларускай мовы, прыгадалі вершы, песні беларускіх аўтараў.

У суботу, 18 лютага, пачаткоўцаў запрасілі прыняць удзел у інтэрактыўнай гульні “Мова родная, сябруй са мною!” і гульні-віктарыне “Размаўляем па-беларуску”. Конкурсная праграма “Мова родная – мова модная!” сабрала вучняў 5 — 7 класаў, дзе яны змаглі праявіць свае здольнасці ў веданні беларускай мовы. Старшакласнікі ўдзельнічалі ў спаборніцтвах “Знаўцы роднай мовы”.

Напярэдадні Дня вываду войск з Афганістана ва ўсіх класах школы былі праведзены інфармацыйныя гадзіны.

У суботу, 11 лютага, у школе прайшоў дзень здароўя. Пачаткоўцы прынялі ўдзел у спартыўнай віктарыне “Як мы ведаем зімовыя віды спорту”. Вучні 5 – 7 класаў змагаліся за перамогу ў зімовай эстафеце “Спорт – альтэрнатыва шкодным звычкам”.

Таксама ў гэты дзень таты школьнікаў сабраліся на бацькоўскі сход, дзе абмеркавалі пытанні выхавання падлеткаў, праглядзелі відэафільм, які паведаміў аб наступствах ужывання алкаголю, тытуню, наркотыкаў. Пасля сходу адбыліся спаборніцтвы па валейболе паміж бацькамі і вучнямі 8 – 11 класаў.

Алімпіяда па агульнаадукацыйных і спецыяльных дысцыплінах для старшакласнікаў

8 лютага ў школе прайшоў піянерскі збор, прысвечаны Дню юнага героя-антыфашыста «Памятаць, каб жыць».

7 лютага для вучняў 5 — 7 класаў было арганізавана мерапрыемства пад назвай “Майстар лірычнага пейзажу”, на якім вучні пазнаёміліся з жыццёвым і творчым шляхам мастака Вітольда Каэтанавіча Бялыніцкага-Бірулі.

4 лютага адбыўся традыцыйны вечар сустрэчы выпускнікоў. Зала сельскага клуба, у якой праходзіла ўрачыстая частка вечара, была перапоўнена. На сустрэчу сабраліся выпускнікі розных пакаленняў, а ў цэнтры ўвагі быў выпуск 1977 года, які закончыў школу 40 гадоў таму. Арганізатары мерапрыемства не толькі самі спявалі, танцавалі, інсцэніравалі, але і стараліся ўключыць ва ўсё гэта выпускнікоў.  Цудоўны настрой, станоўчыя эмоцыі атрымалі ўсе, хто сабраўся на сустрэчу школьных сяброў.

У суботу, 4 лютага, пачаткоўцы адправіліся ў падарожжа, наведаўшы гістарычны экскурс “Дзеці ў гады Вялікай Айчыннай вайны”, і прынялі ўдзел у спартыўнай эстафеце “Наша шчаслівае дзяцінства”. Вучняў 5 – 7 класаў запрасіла гадзіна патрыятычнай песні “Песні ваеннай пары”. Старшакласнікі ўдзельнічалі ў спаборніцтвах па валейболе, прысвечаных памяці воінаў, загінуўшых пры выкананні інтэрнацыянальнага доўгу  ў Афганістане, і гадзіне мужнасці “Любім, памятаем Вас, абаронцы Айчыны”.