20 мая ў школе праводзілася агульнашкольнае спартыўнае свята  Дзень алімпійца. У ім прымалі ўдзел вучні 1-11 класаў. Пастраенне ўсіх класаў адбылося на пляцоўцы перад школай, затым настаўнік фізкультуры Аўдзяйчук А.У. далажыў дырэктару аб гатоўнасці школы да ўдзелу ў спаборніцтвах. Лепшымі спартсменамі нашай школы на лінейку былі вынесены алімпійскі сцяг і агонь. Пад гімн Рэспублікі Беларусь былі падняты Дзяржаўны і алімпійскі сцягі, затым усе адправіліся на стадыён.

   Спаборніцтвы праводзіліся па ўзроставых групах. Змагацца было вельмі цяжка, але як заўсёды самае прыемнае — гэта калі  ўзнагароджваюць пераможцаў. А пераможцаў было шмат.

   19 мая — свята, якое яднае сучасных піянераў, дае магчымасць адчуць сябе сапраўднымі грамадзянамі Беларусі. У гэты дзень у школе прайшоў збор піянерскай дружыны, на якім усе вучні 4 класа сталі членамі ГА «БРПА». Павіншаваць нашых піянераў і пажадаць цікавай, творчай работы, добрага настрою прыйшлі члены ГА «БРСМ», бацькі і настаўнікі.

   18 мая адзначаецца Міжнародны дзень памяці людзей, якія памерлі ад СНІДу. Акцыя з гэтай нагоды ўпершыню прайшла ў Сан-Францыска, дзе арганізатары ўшанавалі тых, каго ўжо няма, і падтрымалі тых, хто змагаецца з “чумой ХХ стагоддзя”.

   Вучні нашай школы наведалі пазнавальна-прафілактычную гадзіну «СНІД — праблема сучаснасці», якую правяла настаўніца біялогіі і геаграфіі Дзенісюк В. М.

   16 мая вучні нашай школы прынялі ўдзел у акцыі “Зробім!” – сусветнай валанцёрскай акцыі па збору смецця ў месцах з несанкцыянаванымі звалкамі пераважна ў прыродных зонах. Яны навялі парадак вакол сядзібы Дзяконскіх у вёсцы Каштанаўка.

   На мінулым тыдні, з 11 па 16 мая, для вучняў школы быў арганізаваны прагляд кінафільмаў «Асновы бяспекі на вадзе» і «Азбука выжывання», якія пазнаёмілі вучняў з правіламі знаходжання на вадаёмах і правіламі аказання першай неадкладнай дапамогі пацярпеламу.

   У рамках святкавання 70-годдзя Вялікай Перамогі ў школе быў праведзены турнір «Вікторыя», на які былі запрошаны педагогам-арганізатарам Калядой А. Г. вучні старэйшых класаў.

   З 11 па 16 мая ў школе прайшла выстава дзіцячых творчых работ, зробленых з выкарыстаннем тэкстыльных матэрыялаў. Свае работы прадставілі вучаніцы 5-6 класаў.

   15 мая, у Дзень сям’і, члены атрада «Міласэрнасць» разам з педагогам сацыяльным Чарэшка Г. У. павіншавалі шматдзетныя сем’і са святам.

А вучні чацвёртага класа прынялі ўдзел у конкурсе малюнкаў «Мая сям’я — мая радасць».

   Днямі выпускнікамі школы быў прэзентаваны стэнд «Каб быць здаровым». Вучні прадставілі матэрыялы, якія расказваюць аб асаблівасцях рухальнай актыўнасці, правільным харчаванні, выкананні рэжыму дня і інш. На стэндзе размешчаны буклеты і брашуры, накіраваныя на прафілактыку шкодных звычак, а таксама такіх небяспечных хвароб, як туберкулёз, энцэфаліт, менінгіт, СНІД. Не абышлі ўвагай і пытанні наступстваў шаленства.

   Традыцыйна святкаванне Дня Перамогі пачалося ў 10 гадзін каля помніка загінуўшым у гады Вялікай Айчыннай вайны ў цэнтры аграгарадка.

   На мітынг прыйшлі  школьнікі, моладзь, жыхары аграгарадка. Усім удзельнікам і гасцям мітынгу вучнямі і педагогамі школы былі прышпілены чырвона-зялёныя стужкі з яблыневымі кветкамі.

   На мітынгу з прывітальным словам выступіў старшыня сельвыканкама Лапука Сяргей Іванавіч. Дырэктар школы Ярмашэвіч Алена Мікалаеўна павіншавала прысутных з Днём Перамогі, выказала  словы павагі ветэранам.

   Айцец Міхаіл, настаяцель Свята-Мікалаеўскай царквы, звярнуўся да ўдзельнікаў вайны са шчырымі словамі падзякі за мужнасць і гераізм.  Ён адзначыў, што Дзень Перамогі – гэта самае дарагое свята для кожнага чалавека.

   Вучні  школы прачыталі імёны тых, хто не вярнуўся з поля бою. Члены драматычнага гуртка выступілі перад сабраўшыміся з літаратурнай кампазіцыяй.  Да помніка былі ўскладзены кветкі і вянкі.