Умелыя рукі не ведаюць суму
Днямі выхаванцаў запрасілі на майстар-клас па вырабу падзелак у тэхніцы «тарцаванне». Мерапрыемства правяла мясцовая майстрыха Кабрынец Т.Ф.
Дзень дзяўчынак і хлопчыкаў
Наведвальнікі лагера «Дружба» прынялі ўдзел у конкурсных праграмах «Узыходзячая зорка» і «А ну, дзяўчынкі і рыцары хлопчыкі!» Пасля правядзення разнастайных конкурсаў былі выбраны міс (Міранюк А.) і містар лагера (Хоміч А.).
Дзень памяці
Выхаванцы летніка «Дружба» наведалі памятныя мясціны Пружаншчыны. Падчас наведвання яны ўшанавалі памяць герояў, якія аддалі сваё жыццё дзеля міру на роднай зямлі, хвілінай маўчання.
МНС нагадвае
Днямі з выхаванцамі аздараўленчага лагера праведзены вучэбна-трэніровачныя заняткі па пажарнай бяспецы, якія былі арганізаваны работнікамі Пружанскага РАНС. Змястоўная гутарка перарасла ў зацікаўлены дыялог інспектара РАНС Ліпко В.В. з вучнямі па праблеме пажарнай бяспекі. Асаблівую цікавасць дзяцей выклікала тэхніка: сучасная пажарная машына і разнастайныя прыстасаванні для работы ў надзвычайных сітуацыях.
Дзень алімпійца
18 чэрвеня ў аздараўленчым лагеры прайшлі Малыя алімпійскія гульні. Падчас правядзення мерапрыемства выхаванцы даведаліся шмат цікавага і карыснага ў галіне спорту і асноў здароўя, змагаліся ў спрытнасці, сіле, развівалі хуткасць і ўвагу.
Дзень экалогіі
З правіламі паводзін і аховы навакольнага асяроддзя, а таксама з жыхарамі зялёнага царства пазнаёміліся ўдзельнікі літаратурнай забавы, гульні «Экалагічны калейдаскоп» і падарожжа ў «Краіну цара Берандзея». Гутарку аб небяспечнасці ўкусаў кляшчоў і іх наступствах з наведвальнікамі лагера правяла фельчар Шаняўскога ФАПа Рыбачок Я.Р.
Назаўжды ў памяці людзей
Выхаванцы летніка «Дружба» пабывалі на радзіме юнага ўдзельніка партызанскага руху на тэрыторыі Пружанскага раёна Ціхана Барана. Яны даведаліся аб тым, як Ціхан збіраў для партызан боепрыпасы, зброю, прадукты, звесткі аб ворагу, распаўсюджваў сярод насельніцтва антыфашысцкую літаратуру, як з 1942 года стаў сувязным партызанскага атрада, у якім змагаліся трое яго старэйшых братоў. Таксама цікава было даведацца дзецям аб тым, як гарэла вёска, як карнікі расстрэльвалі людзей, сярод якіх былі і сёстры-блізняткі хлапчука. Імя піянера з вёскі Байкі, які паўтарыў подзвіг Івана Сусаніна, стаў прыкладам мужнасці і гераізму для выхаванцаў.
Гісторыя Ружанскага замка
Палацавы комплекс у Ружанах – адзін з унікальных куткоў Беларусі, які на працягу стагоддзяў належаў магутнай дынастыі Сапегаў. Выхаванцы аздараўленчага лагера наведалі найпрыгажэйшы архітэктурны ансамбль, даведаліся аб гісторыі яго стварэння, атрымалі шмат станоўчых эмоцый.
Птушыны двор пераўтварыўся ў заапарк
Наведвальнікі летніка «Дружба» пабывалі ў заапарку в. Манчыкі, які стварыў мясцовы прадпрымальнік г.п. Ружаны Валерый Ланшакоў. Дзяцей сустрэлі паўліны, дзясяткі відаў фазанаў, качкі-мандарынкі, дэкаратыўныя курачкі, цацаркі, вавёрачкі, алені, лісы, янатавідныя сабакі, страусы і шмат іншых разнастайных жывёл. Наведванне заапарку пакінула шмат уражанняў і стварыла цудоўны настрой у выхаванцаў.
Здаровым быць здорава!
Кожны дзень у аздараўленчым лагеры праводзяцца мерапрыемствы, накіраваныя на ўмацаванне здароўя падрастаючага пакалення. Выхаванцы ўдзельнічаюць у спаборніцтвах, эстафетах, гульнях на свежым паветры.
