26 лютага ў школе праводзіліся мерапрыемствы, прысвечаныя алімпійцам-2014.

      Вучні кожнага класа ўдзельнічалі ў конкурсе сачыненняў «Маё пісьмо алімпійцу».

      У конкурсе дзіцячых вырабаў «Мой падарунак алімпійцу» удзельнічалі як самыя старэйшыя вучні, так і пачаткоўцы.

  Імі падрыхтаваны работы ў тэхніцы «дэкупаж», жывапіс, аплікацыя, бісерапляценне, арыгамі, работы з пластыліну.

       У час веснавых канікул у школе дзейнічае працоўны атрад, у склад якога ўвайшлі вучні 10 класа. Пяцёра хлопчыкаў і дзяўчынак працуюць па добраўпарадкаванні прышкольнай тэрыторыі.

   Членамі працоўнага атрада будзе высаджана каля сотні дэкаратыўных кустарнікаў, расада шматгадовых і аднагадовых кветак.

      Напярэдадні Дня абаронцаў Айчыны і Узброеных Сіл Рэспублікі Беларусь у школе адбыўся агляд строю і песні. У гэтым годзе ён быў прысвечаны 70-годдзю вызвалення Беларусі ад нямецка-фашысцкіх захопнікаў.

      На працягу некалькіх тыдняў ішла штодзённая падрыхтоўка да конкурсу, таму журы, у склад якога ўвайшлі былыя вайскоўцы і педагогі школы, было складана вызначыцца з пераможцамі.

     І ўсё ж ІІІ месца было аддадзена вучням 7 і 10 класаў, ІІ — вучням 5 класа, а перамогу святкавалі адзінаццацікласнікі.

    Лепшым камандзірам журы назвала Тунчык Настассю з 7 класа. А пазаконкурснае выступленне вучняў 3 і 4 класаў выклікала бурныя апладысменты ў прысутных.

        21 лютага ў школе прайшлі мерапрыемствы, прысвечаныя Міжнароднаму дню роднай мовы.

      Вучні 7 — 9 класаў сталі ўдзельнікамі праграмы «Разумнікі і разумніцы», а малодшыя школьнікі прынялі актыўны ўдзел у вусным часопісе «Гучы, маё роднае слова». 

      Тым часам старэйшыя класы таксама не засталіся ў баку, прыняўшы ўдзел у конкурсе эрудытаў «Роднае слова — вечнасці след». Падчас захапляльнага падарожжа па краіне Мовазнавіі вучні 10 — 11 класаў адгадвалі рэбусы, даведаліся шмат новага аб паходжанні слоў, тлумачылі прыказкі і прымаўкі шляхам пантамімы, а таксама спявалі песні.

      19 лютага, у час дадатковых канікул, вучні 1-2 класаў разам з класнымі кіраўнікамі Тарасавай М. Б. і Шпарла Г. А. наведалі музей-сядзібу «Пружанскі палацык».

      Вучні мелі магчымасць пазнаёміцца з мінулым сядзібы, даведацца, як ствараўся музей і чым ён жыве, заглянуць у экспазіцыйныя залы і музейныя фонды, азнаёміцца з праграмай выстаў і мерапрыемстваў, атрымаць звесткі аб паслугах музея.

       Усе навуковыя адкрыцці пачынаюцца з самых неверагодных фантазій. Менавіта таму навучэнцы нашай школы прымаюць актыўны ўдзел у конкурсах  рознага маштабу.

     Члены гуртка «Умелыя ручкі» (кіраўнік Тарасава М. Б.) падрыхтавалі калектыўную работу «Каб у хату не прыйшла бяда», а Бова Кацярына, навучэнка 8 класа, падрыхтавала індывідуальную работу «Згарэць не дадзім» (кіраўнік Ханіла В. С.) на раённы этап рэспубліканскага конкурсу «Выратавальнікі вачамі дзяцей».

     Ніпарка Ганна, навучэнка 3 класа, падрыхтавала работу «Мары будучыні» (кіраўнік Бяляева І. Р.) для ўдзелу ў конкурсе малюнкаў «Навука вачамі дзяцей», які праводзіцца Паркам высокіх тэхналогій і Мінскім абласным інстытутам развіцця адукацыі пры падтрымцы кампаніі Hewlett-Packard.

      У бягучым навучальным годзе ў школе абагульняецца вопыт настаўніка фізікі Семянчук В. М. па тэме «Развіццё пазнавальнай актыўнасці вучняў на ўроках фізікі даследчым метадам». Валянціна Мікалаеўна неаднаразова дзялілася вопытам сваёй работы на пасяджэннях метадычнага аб’яднання настаўнікаў фізіка-матэматычнага цыкла, на педагагічным савеце, нарадах пры дырэктару. А 18 лютага педагогі школы мелі магчымасць  пазнаёміцца з вопытам Валянціны Мікалаеўны па дадзенай тэме, наведаўшы ўрок фізікі ў 9 класе па тэме «Віды сіл трэння. Сілы супраціўлення асяроддзя».

    12 лютага на базе школы адбылося пасяджэнне раённага метадычнага аб’яднання настаўнікаў біялогіі па тэме «Мадэліраванне сучаснага ўрока біялогіі на аснове спалучэння тлумачальна-ілюстратыўных, эўрыстычных метадаў навучання і самастойнай работы вучняў, прымяненне даследчых падыходаў і праблемнага выкладання матэрыялу».

   У ходзе семінара-практыкуму былі разгледжаны пытанні: арганізацыя самастойнай работы вучняў на ўроках біялогіі, развіццё пазнавальнай актыўнасці школьнікаў у працэсе праблемнага навучання біялогіі, арганізацыя праектнай дзейнасці ў выкладанні біялогіі і рэфлексія педагагічнай дзейнасці настаўніка біялогіі.

     Адкрыты ўрок па біялогіі ў 7 класе па тэме «Сфагнавыя імхі. Значэнне імхоў» правяла настаўніца біялогіі і геаграфіі ІІ кваліфікацыйнай катэгорыі Дзенісюк В. М.

     12 лютага вучэбны дзень у школе пачаўся з урачыстай лінейкі, прысвечанай перамозе беларускай біятланісткі Дар’і Домрачавай на Алімпійскіх гульнях у Сочы. 

    Настаўнікі і вучні школы выказалі словы захаплення і павагі да вялікай спартсменкі.

          Пачуццё гонару і вялікую радасць прысутныя раздзялілі з усёй краінай.

      Да дня юнага героя-антыфашыста ў школе штогод праводзіцца збор піянерскай дружыны.

    У гэтым годзе збор праходзіў пад назвай «Мы будзем памятаць». У ходзе мерапрыемства піянерам была прадстаўлена прэзентацыя «Дзеці ў гады Вялікай Айчыннай вайны». 

      Кожны піянерскі атрад падрыхтаваў выступленне аб піянерах-героях Беларусі.