22 сакавіка вучні 5 — 6 класаў разам са сваімі класнымі кіраўнікамі Граб В. М. і Кечка А. В. пабывалі ў Брэсцкім біялагічным музеі (БрДУ імя А.С. Пушкіна). З вялікім захапленнем яны слухалі аповед экскурсавода, які паведаміў шмат цікавых фактаў аб прыродзе Брэсцкай вобласці.
Таксама для іх была арганізавана аглядная экскурсія па вуліцах Брэста.
22 сакавіка для вучняў пачатковых класаў была арганізавана экскурсія па лядовым палацы г. Пружаны. Дзеці ўбачылі лядовую арэну, трэніроўкі фігурыстаў, памералі вопратку хакеістаў, пагулялі ў настольны хакей, атрымалі шмат станоўчых эмоцый.
У суботу, 19 сакавіка, у школе прайшоў дзень прафарыентацыі. Вучні 1 — 4 класаў удзельнічалі ў гульнёвай праграме «Хто нам пабудуе дом?», навучэнцы 5 — 7 класаў спаборнічалі ў гульні- конкурсе “Адгадай прафесію”, а старшакласнікі абмяркоўвалі пытанні выбару прафесіі ў дзелавой гульні “ Наш старт сёння ў будучае заўтра”.
Дыпломам ІІІ ступені ўзнагароджана вучаніца 8 класа Маршалок Ганна (настаўнік Граб В. М.), якая прыняла ўдзел у раённым этапе алімпіяды па здаровым ладзе жыцця.
З 13 па 19 сакавіка ў школе быў арганізаваны працоўны дэсант па збору другаснай сыравіны. У ім прынялі актыўны ўдзел вучні ўсіх класаў, іх бацькі, а таксама настаўнікі.
19 лютага ў г. Пружаны прайшоў раённы агляд-конкурс піянерскіх агітбрыгад «Запалі касцёр дабрыні». У ім прынялі ўдзел і вучні нашай дружыны. У выступленні члены агітбрыгады расказалі аб сваім піянерскім жыцці: конкурсах, акцыях, экскурсіях, аперацыях.
З 30 сакавіка па 3 красавіка 2016 года на базе Культурна-спартыўнага рэспубліканскага ўнітарнага прадпрыемства «Палац спорту» адбудзецца Міжнародны маладзёжны праект «Child & Youth Week».
Праект рэалізуецца ў адпаведнасці з падпраграмай «Маладзёжная палітыка» дзяржаўнай праграмы «Адукацыя і маладзёжная палітыка» на 2016-2020 гг.
Мэтай мерапрыемства з’яўляецца выяўленне і падтрымка таленавітай і адоранай моладзі, стварэнне ўмоў для развіцця і рэалізацыі творчага патэнцыялу маладога пакалення, прэзентацыя і развіццё маладзёжных творчых аб’яднанняў, папулярызацыя здаровага ладу жыцця, прафілактыка негатыўных з’яў у маладзёжным асяроддзі.
Праграма мерапрыемства ўключае правядзенне спаборніцтваў па хіп-хопу, вулічных танцавальных напрамках, джазу, мадэрну, танцавальнаму шоў, чэрлідынгу, скейтбордынгу і інш. з запрашэннем прадстаўнікоў міжнароднага судзейства, а таксама канцэртную шоў-праграму «Данс эволюшн» з удзелам наймацнейшых танцораў і спартсменаў свету .
Настаўніца біялогіі і геаграфіі Граб В. М. узнагароджана дыпломам І ступені за ўдзел у раённым конкурсе праектаў на лепшы тэматычны тыдзень па біялогіі.
Не першы год займаюцца таэквандо ў спартыўнай школе Пружанскага аддзялення ўстановы «Брэсцкая ДЮСШ прафсаюзаў па відам барацьбы» брат і сястра Бойдзічы Аляксандр і Валерыя. На спаборніцтвах рознага ўзроўню іх выступленні адзначаны медалямі і дыпломамі І, ІІ і ІІІ ступені. Так, у гэтым навучальным годзе, Аляксандр заваяваў дыплом І ступені ў XVIII адкрытым рэспубліканскім турніры WTF і два дыпломы ІІІ ступені ў дзіцяча-юнацкім турніры «Адкрыты Кубак Сталіцы» і чэмпіянаце па таэквандо ў Балгарыі. Валерыя адзначана дыпломам ІІ ступені сярод дзяцей класа Б ў дзіцяча-юнацкім турніры «Адкрыты Кубак Сталіцы».
Віншуем!
У суботу, 12 сакавіка, у школе прайшоў Дзень здароўя пад дэвізам «На Дзень здароўя — усёй сям’ёй».
Вучняў 1 — 5 класаў і іх бацькоў заклікала да сябе ў госці «Вясёлая Масленка». Дзеці вадзілі карагоды, «пяклі» бліны, гулялі ў розныя гульні. Таксама яны прынялі ўдзел у Алімпійскай спартландыі «Алімпійская сям’я».
Гульнёвую праграму «У госці да казачных герояў» наведалі навучэнцы 5 — 7 класаў. Яны ўспомнілі многіх казачных герояў, вядомых з дзяцінства. А яшчэ іх запрасілі паўдзельнічаць у віктарынах і конкурсах спартыўнай гульні «Багачы і сілачы».
