1 сакавіка старшакласнікі былі запрошаны на адкрыты дыялог «Кошт залежнасці — жыццё». Удзел у дыялогу прыняў настаяцель Свята-Мікалаеўскай царквы в. Засімавічы айцец Сергій.
У час шчырай размовы вучні гаварылі аб здароўі, як аб галоўнай умове шчаслівага жыцця, аб шкодным уздзеянні наркатычных сродкаў на арганізм чалавека. Таксама быў прагледжаны і абмеркаваны відэаролік «Моладзь супраць наркотыкаў».
У суботу, 27 лютага, пачаткоўцы прынялі ўдзел у конкурсе малюнкаў «Фізкультуру любіць — здаровым быць». Вучні 5 — 9 класаў паказалі свае веды ў пазнавальнай гульні “Як не стаць ахвярай шкодных звычак”. Старшакласнікі абмяркоўвалі праблемы ўжывання наркатычных сродскаў у адкрытым дыялогу “Моладзь за здаровы лад жыцця”.
26 лютага ў рамках акцыі “Адзіны рэспубліканскі дзень бяспекі” ў школе былі праведзены мерапрыемствы, накіраваныя на выпрацоўку правіл паводзін у надзвычайных сітуацыях: на дарозе, пры пажары, на вадаёме, пры карыстанні электрапрыборамі.
26 лютага ўсёй школай праведзена адпрацоўка плана эвакуацыі на выпадак надзвычайных сітуацый. На сігнал пажарнай трывогі — неперарыўны званок, адрэагавалі адразу. Быў зроблены ўмоўны званок у службу 101. Эвакуацыя прайшла арганізавана. Усе вучні і педагогі менш, як за 2 хвіліны выстраіліся на эвакуацыйнай пляцоўцы.
З 20 лютага па 1 сакавіка 2021 года праходзіць першы этап Адзінага рэспубліканскага дня бяспекі.
Выніковым мерапрыемствам Месячніка патрыятычнага выхавання стаў конкурс інсцэніраванай песні «Песні вайны. Песні аб вайне». Актыўны ўдзел у мерапрыемстве прынялі вучні 3-10 класаў. Усе атрымалі граматы і бурныя апладысменты гледачоў.
22 лютага вучні 5-7 класаў прынялі ўдзел у інтэлектуальнай гульні «Родная мова — матчына мова, ззяе вясёлкай кожнае слова», прысвечанай Дню роднай мовы. Падчас правядзення мерапрыемства школьнікі змаглі ўбачыць і адчуць наколькі багатая, мудрая і самабытная беларуская мова. У гульнёвай форме вучні здолелі паказаць свае веды і моўную эрудыцыю.
У ходзе Месячніка патрыятычнага выхавання для вучняў пачатковых класаў была праведзена інтэрактыўная гульня “Падарожжа па лабірынце Памяці”. Вучні прайшлі па пяці станцыях, на якіх называлі песні аб Вялікай Айчыннай вайне, супастаўлялі лічбы і даты ваенных часоў, чыталі вершы аб вайне, знаёміліся з літаратурай аб вайне.
Некалькі месяцаў на перапынках шасцікласнікі збіралі мазаіку, якая цяпер упрыгожвае іх кабінет.
Cёння у свеце шмат цудоўных моў. Адны з іх вабяць сваёй прыгажосцю і непаўторнасцю, другія – мілагучнасцю. Але ў кожнага чалавека ёсць толькі адна родная мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. І вельмі дрэнна, калі чалавек пачынае забывацца на сваю мову, не шануе яе. 21 лютага адзначаецца Дзень роднай мовы. З нагоды гэтага свята для вучняў пачатковых класаў была праведзена гульня-падарожжа “Вольная, пявучая мова беларуская”, дзе вучні разгадвалі крыжаванку, складалі беларускія прыказкі і прымаўкі, займаліся перакладам. А вучні 5 — 9 класаў спаборнічалі ў конкурсе знаўцаў «З любоўю да роднай мовы».
