Вучні і настаўнікі школы прынялі ўдзел у эстафеце-флэшмобе да Дня народнага адзінства, што спрыяла развіццю пачуцця любові да Радзімы і патрыятызму, з’яднала ўсіх на дасягненне агульных мэт.
У рамках Тыдня народнага адзінства ва ўсіх класах прайшлі інфармацыйныя гадзіны, прымеркаваныя да Дня народнага адзінства. Дзень народнага адзінства — дзяржаўнае свята ў Беларусі, якое адзначаецца штогод 17 верасня. Цяпер гэта дата – сімвал нашага адзінства, моцы духу і веры ў светлую будучыню.
Святкаванне Дня народнага адзінства – даніна памяці нашым суайчыннікам, якія змагаліся за ўз’яднанне беларускага народа ў адзінай нацыянальнай дзяржаве. Менавіта адзінства дапамагло нам выстаяць у гады Вялікай Айчыннай вайны, перамагчы і аднавіць краіну з руін. І сёння мы разам працуем на карысць нашай Радзімы – Рэспублікі Беларусь.
Сёння беларускі народ аб’яднаны ў выбары стратэгічнага курсу на развіццё моцнай, суверэннай і квітнеючай краіны. Устанаўленне Дня народнага адзінства 17 верасня падкрэслівае пераемнасць пакаленняў, непахіснасць і самадастатковасць беларускай нацыі і дзяржаўнасці.
Сапраўдная любоў да Радзімы пачынаецца з ведання дзяржаўных сімвалаў-герба, сцяга, гімна і павагі да іх. Прывіць гэта пачуццё падрастаючаму пакаленню — адна з асноўных задач. У нашай установе адукацыі склалася добрая традыцыя: раніцу кожнага аўторка пачынаць з цырымоніі вынасу Дзяржаўнага сцяга і выканання Дзяржаўнага гімна Рэспублікі Беларусь.
Вельмі сімвалічна ў Год міру і стварэння ўспомніць тых, хто захаваў мірнае неба над нашай галавой. Кіраўнік па ваенна-патрыятычным выхаванні Пекун Н.А. правяла для дзяцей цікавы квэст «Партызанскімі сцежкамі». Удзельнікам квэста неабходна было прайсці 6 станцый, выканаць на кожнай станцыі заданне і сабраць 6 запаветных літар «П», «Е», «Р», «А», «М», «О», «Г»,«А». Станцыі «Трапны стралок», «Піянеры-героі», «Міннае поле», «Гэтых дзён не змоўкне слава» выклікалі ў дзяцей масу станоўчых эмоцый. Навучэнцы ўспомнілі важныя даты, падзеі і імёны, якія прынеслі ў гады Вялікай Айчыннай вайны радасць перамог і горыч паражэнняў. Веданне гісторыі краіны і раёна, інфармацыя пра герояў вогненных гадоў, а таксама спартыўны спрыт спатрэбіліся дзецям. Заключным момантам мерапрыемства стала выкананне ваенных песень пад гітару.
Сёння святкуе свой 100-гадовы юбілей ветэран Вялікай Айчыннай вайны Бабрук Марыя Аляксандраўна. Навучэнцы школы сумесна з прадстаўнікамі ААТ «Шані-аграпрадукт», Шаняўскога сельвыканкама, Савета ветэранаў Пружанскага райвыканкама, Шаняўскога клуба-бібліятэкі павіншавалі Марыю Аляксандраўну з такой знамянальнай датай.
Маляваць каляровымі крэйдамі, ды яшчэ не на паперы, а на асфальце — гэта шчасце для любога дзіцяці. Менавіта таму ў рамках работы рознаўзроставага атрада ў вёсцы Кацёлкі прайшоў конкурс малюнка на асфальце.
Тэматыка конкурсу кіраўніком па ваенна-патрыятычным выхаванні Пекун Н.А. была абраная не выпадкова. У наш няпросты час менавіта з дзяцінства павінна прывівацца любоў да ўсяго роднага: да бацькавай хаты, да краіны, у якой нарадзіўся.
У гэты дзень асфальт для хлопцаў ператварыўся ў палатно, а фантазія дзяцей не ведала межаў.
Дзеці вельмі стараліся, акуратна размалёўваючы свае малюнкі, ніхто не сумаваў, усе былі занятыя творчасцю, а ў выніку атрымалася цэлая карціна. Асфальт пакрыўся дзіўнымі фарбамі.
З мэтай далучэння навучэнцаў да матэрыяльнай і духоўнай культуры беларускага народа і да яскравага свету народных гульняў на гульнявой пляцоўцы вёскі Кацёлкі кіраўніком па ваенна-патрыятычным выхаванні Пекун Н.А. праведзены творчы мікс «Я люблю Беларусь». У ходзе мерапрыемства дзеці пазнаёміліся з правіламі і пагулялі ў беларускія народныя гульні «Гусі-лебедзі», «Золата», «Лянок», «Ручаёк». З добрым настроем яны адправіліся дадому.
Дні ў аздараўленчым лагеры праходзяць заўсёды хутка і весела. Асабліва захапляюць выхаванцаў творчыя конкурсы, спартыўныя эстафеты, гульні на свежым паветры, якія ўзнімаюць дух спаборніцтва і даюць магчымасць кожнаму праявіць свае лепшыя фізічныя якасці. У рамках Года міру і стварэння школьнікі ўдзельнічаюць у мерапрыемствах, прысвечаных трагічнаму лёсу беларускага народа ў гады Вялікай Айчыннай вайны. Імёны герояў назаўсёды застануцца ў памяці малодшага пакалення.
Чацвёрты дзень канікул быў вельмі насычаны рознымі мерапрыемствамі. Удзел у літаратурна-музычнай кампазіцыі «Як здорава пад мірным небам жыць» дапамог выхаванцам раскрыць свае ўменні ў дэкламаванні вершаў, выкананні песень аб роднай зямлі і мірным небе, складанні прыказак і прымавак. Цікавай і захапляльнай была экскурсія для выхаванцаў аздараўленчага лагера па сацыяльных аб’ектах аграгарадка. Вучні наведалі магазін «Вясна», комплексны прыёмны пункт, паштовае аддзяленне сувязі. Гадзіна памяці «Спасибо деду за Победу», якая была праведзена каля помніка ахвярам фашызму ў аг. Шані, яшчэ раз нагадала дзецям аб тым, што памяць пра загінуўшых павінна заўсёды быць у нашых сэрцах.
